كشفت الفنانة  نادية شكري، بطلة مسرحية العيال كبرت والوحيدة المتبقية على قيد الحياة من أبطال المسرحية سبب ابتعادها عن الوسط الفني في الآونة الأخيرة، كما تحدثت عن رأيها بالأعمال التي تعرض حاليًا.

وقالت نادية شكري: "الجيل بتاعي بيعاني؛ لأننا تعودنا على طريقة معينة في التمثيل ومبقتش موجودة ودلوقتي بيطلبوا مني أعمل تجارب أداء، وأروح مكاتب كاستنج وكأني ببدأ من الصفر، ودا لأني سافرت 7 سنين برا مصر وبعدت فترة كبيرة".

وواصلت نادية شكري: "زمان المخرج كان بييجي يشوف الممثل بنفسه ودا مبقاش موجود.. وأنا مقدرش أتنازل عن كرامتي أنا معتزلتش أبدًا ولكن التمثيل بقى بنظام الشلل والعلاقات، وبالتالي نفس الممثلين هما اللي بيظهروا في جميع الأعمال، والنقابة مش قادرة تحل الأزمة دي وتشغل الناس اللي قاعدين في بيوتهم لأن المنتجين مش بيسمعوا".

وأكملت: "وأنا بطلت أظهر في لقاءات تليفزيونية لأني حسيت أن نفس الكلام بيتعاد، وكنت بظهر بهدف المشاركة، ولكن حسيت أن ده بلا هدف وقولت أقعد في البيت أفضل وبقيت أسيبها على ربنا".