كشفت والدة الطالبة نيرة أشرف، ضحية المنصورة، عن حقيقة العلاقة بين ابنتها الراحلة والجاني، قائلة: «مكنش في بينهم قصة حب ولا أي حاجة خالص، دا مجرد زميل لها في الجامعة قصدته في أبحاث أيام الكورونا لأنها كانت قاعدة في القاهرة مش بتنزل، وعملها الأبحاث، ومن يومها فكر بقى إنها ممكن تحبه ويعمل علاقة معاها ويمشي معاها بالعافية غصب عنها».

وأضافت والدة نيرة في حوارها لبرنامج «يحدث في مصر» على فضائية «إم بي سي مصر» الثلاثاء: «نيرة كانت بتقولي إيه الواد الأهبل اللي هفكر أبص له دا، وقعد يطاردها سنتين، ويعمل حسابات مزيفة على الفيس بوك، ويحط صور ويدخل على أبوها واخواتها وقاريبنا وأصحابنا وشردنا وعملنا سمعة زي الزفت، إما تكلمه أو يعمل فيها كده».

وأشارت والدة الضحية إلى أنها جعلت ابنتها تقيم في القاهرة عند أختها وتنزل فقط لخوض الامتحانات، ولكن الجاني تربص بها وهي ذاهبة للامتحان، معقبة: «منعرفش إنه متربص لها، مكنتش نزلتها والله».

وتابعت: «مقالتليش إنه مهددها من 3 أيام ومعرفتنيش حاجة، وعرفنا دا من النيابة لما موبايلها اتفتح هناك، واتضح أنه مهددها من 3 أيام، وإحنا مكناش نعرف، مقالتليش ولا قالت لحد»، لافتة: «قالت كل مرة بيهدد، مش هيعمل حاجه، فعلًا المرة دي موّتها وخدها مني، خد حته من قلبي يا ناس».